Pas situatës së krijuar në veri të Kosovës ditët e fundit ku serbët e ndodhur aty kanë bllokuar rrugët, reagimeve për këtë çështje i është bashkuar dhe presidenti i Këshillit Europian Charles Michel.
Me anë të një mesazhi, ai shprehet se është koha që Kosova dhe Serbia të tërhiqen në mënyrë që gjendja të qetësohet.
Michel pohoi ndër të tjera se po mban kontakte të ngushta me kreun e BE-së për Politikë të Jashtme dhe Siguri, Josep Borrell lidhur me situatën në veri të Kosovës.
“Është koha si për Serbinë ashtu edhe për Kosovën, Aleksandar Vuçiç dhe Albin Kurti, që të tërhiqen dhe të shtensionojnë situatën, duke përfshirë tërheqjen e Njësisë Speciale të Policisë dhe barrikadat dhe të vazhdojnë negociatat mbi propozimin e Përfaqësuesit Special të BE-së Mirosllav Lajçak”, ka shkruar ai në Twitter.
Për zhvillimet në veri të Kosovës, ku serbët lokalë po mbajnë të bllokuara rrugët që shpien drejt dy pikave kufitare me Serbinë, Jarinë dhe Bërnjak, kanë reaguar edhe BE SHBA dhe vendet të tjera, duke kërkuar shtensionim të situatës.
