Komisioni Europian propozoi që të gjithë prodhuesit e pajisjeve telefonike, tabletave, kamerave, kufjeve etj., të krijojnë një karikues universal me qëllim zvogëlimin e mbeturinave, duke inkurajuar konsumatorët të ripërdorin karikuesit ekzistues kur blejnë një pajisje të re.
Sipas Komisionit Europian, qytetarët e BE-së zotërojnë mesatarisht tre karikues të telefonave celularë, por 38% e konsumatorëve nuk kanë qenë në gjendje të karikojnë telefonin e tyre të paktën në një rast sepse nuk kishin karikuesin e duhur në dorë.
“Kjo është një fitore e rëndësishme për konsumatorët dhe mjedisin tonë dhe në përputhje me ambiciet tona jeshile dhe dixhitale,” u shpreh shefja e teknologjisë në BE, Margrethe Vestager.
Në propozimin e BE-së thuhet se të gjithë telefonat inteligjentë (smartphones) që shiten në BE duhet të kenë karikuesin e tipit USB-C. Po të njëjtën portë karikimi duhet të përdorin edhe pajisje si tableta, kamera, kufje dhe altoparlat portativ.
Do të duhen vite që rregulli të hyjë në fuqi, megjithëse duket një pengesë për Apple, që përdor portën e vet të karikimit, llojin “Lightning”. Apple u shpreh se do të vazhdojë “të angazhohet me palët e interesuara për të ndihmuar në gjetjen e një zgjidhjeje që mbron interesin e konsumatorit”.
Megjithatë kompania theksoi se “është e shqetësuar se rregullorja e rreptë do të ndikojë te inovacioni, në vend që ta inkurajojë atë,” gjë e cila “do të dëmtojë konsumatorët në Europë dhe në mbarë botën.”/anabel
