LIGJET E BIZNESIT
Atentati ndaj Eno Matës dyshohet se është porositur nga shqiptarë që jetojnë në Greqi. 32-vjeçari ka qenë pjesë e një bande që kryente grabitje, por gjithashtu është përfshirë dhe në ngjarje kriminale përveç vrasjes së një avokati, që tentoi të parandalonte grabitjen e një argjendarie në Athinë.
I riu që prej disa vitesh ishte rikthyer të jetonte në fshatin e tij të lindjes, Poro, ka vuajtur 8 vite heqje lirie për grabitje, ndërsa për vrasjen e avokatit ishte në kërkim. Pas dënimit, autoritetet greke e dëbuan nga vendi duke mos i lejuar rikthimin. Për porositësit e atentatit pritet të hedhë më shumë dritë dëshmia e vetë Eno Matës, i cili ndodhet në Spitalin e Traumës në Tiranë.
Mata mori tre plumba, ndërsa shoku i tij Sotiraq Mëhilli gjeti vdekjen në vend. “Në Greqi vetëm kam kryer vjedhje, nuk kam bërë vrasje. Porositësit janë nga Greqia, pasi më kanë ngatërruar me pjesëtarë të një bande”, është shprehur 32-vjeçari për Policinë e Vlorës pak pas atentatit.
Pista kryesore e hetimit është aktiviteti kriminal i të riut në shtetin fqinj, ku nuk përjashtohet mundësia që mund të jetë përfshirë në vrasje dhe trafik droge. Motra e 32-vjeçarit, duke folur për mediat greke ka deklaruar se Eno ka vuajtur nga probleme mendore gjatë qëndrimit në burg. Ajo thotë se i janë dukur të çuditshme deklaratat e të vëllait para gjykatës, ku shprehej se kërkonte të bëhej i famshëm.
Madje, në një rast ai është parë duke hedhur në oborret e banesave paratë e grabitura. Ndërkohë, Policia përjashton mundësinë që shënjestër e atentatit të ketë qenë 22- vjeçari Mëhilli. I riu nuk rezulton person me precedentë penalë. Autorët dogjën automjetin e përdorur në fshatin Bishan, ku brenda u gjetën dhe dy armë kallashnikovë.
