Presidenti i vendit, Ilir Meta në një intervistë për Tv Dukagjinin në Kosovë ka folur edhe për çështjen e dialogut Kosovë-Serbi.
Për Metën, Shqipëria nuk duhet të përzihet në këtë temë, pasi ajo mbetet bilaterale mes Prishtinës dhe Beogradit.
Sipas kreut të shtetit shqiptar, Tirana duhet tag mbështesë dialogun dhe të pranojë çdo vendim që do të prodhojë ai për të mirën e gjithë rajonit të Ballkanit Perëndimor.
“Në mënyrë fare të qartë e të kristaltë, qëndrimi im i vetëm si President i Republikës së Shqipërisë në raport me çështjen e dialogut Kosovë-Serbi ka qenë, është dhe do të mbetet i pandryshueshëm, me çdo faktor të Kosovës apo të Shqipërisë dhe me çdo përfaqësues të faktorëve ndërkombëtarë: dialogu Kosovë-Serbi është një përgjegjësi ekskluzive e udhëheqësve të Kosovës dhe e institucioneve të Kosovës. Shqipëria, duke e mbështetur këtë dialog do të pranojë dhe duhet të pranojë çdo zgjidhje për të cilën institucionet e Kosovës do të shprehen në përputhje me Kushtetutën e Kosovës dhe në përputhje me vullnetin e popullit të Kosovës.”- tha Meta.
