Kosova në zi kombëtare në nder të viktimave/ U përmbys autobuzi me udhëtarë shqiptarë

Kosova është ditën e sotme në zi Kombëtare për shkak të aksidentit të rëndë në Kroaci, ku deri më tani janë raportuar 10 shqiptarë të vdekur. Presidentja Vjosa Osmani, ka shpallur 26 korrikun ditë zie kombëtare në nder të qytetarëve që humbën jetën.

Ajo ka ndërprerë vizitën në Japoni dhe ditën e sotme do të udhëtojë për në Kosovë.

Nga aksidenti i shkaktuar në orët e para të ditës së djeshme kanë vdekur 10 persona, teksa janë lënduar 45 të tjerë, 8 prej të cilëve janë në gjendje të rëndë shëndetësore. Autobusi me targa nga Kosova ishte nisur nga Frankfurti i Gjermanisë për në Kosovë por për fat të keq është aksidentuar në Kroaci.

Kryeministri i Kosovës Albin Kurti, ka shkuar në Kroaci për të vizituar bashkatdhetarët e lënduar të cilët po marrin trajtim mjekësor në spitalin e Slavonski Brodit.