“Ka dhe eshtra fëmijësh” Zbulimi i varrit masiv në Përmet, flet arkeologu: Nuk i përket viktimave të komunizmit

Sipas arkeologëve varri masiv i zbuluar afërsisht 2 javë më parë në Përmet, nuk i përket ish-të përndjekurve politikë në kohën e komunizmit në Shqipëri, por periudhës mesjetare.

Ky reagim vjen një ditë pasi kreu i shoqatës anti-komuniste të të përndjekurve politikë, Nebil Çika, deklaroi se varri i përket personave të ekzekutuar nga regjimi komunist.

Arkeologu Memisha në një deklaratë për mediat tha se sipas vlerësimeve paraprake, është arritur në përfundimin se varreza është mesjetare nisur nga tipologjia, pozicionimi dhe shpërndarja e tyre.

“Kemi tashmë 10 ose 12 ditë që po e ndjekim këtë situatë nga afër, kemi bërë konstatimet përkatëse dhe vlerësimin paraprak. Kemi arritur në përfundimin se kemi të bëjmë me një varrezë të periudhës mesjetare.

Informacionet kanë qenë pothuajse të munguara, megjithatë tipologjia e varreve të gjetura, pozicionimi, shpërndarja e tyre dhe konstruksioni na tregon që kemi të bëjmë me një varrezë interesante të periudhës mesjetare.

Brenda saj do kemi disa faza, por jemi duke pritur rezultatet. Aktualisht në sipërfaqe dallohen 10 varre por jemi të sigurtë që do ketë edhe të tjera. Është herët për të folur, por nga konstruksioni mund të themi që kemi të bëjmë edhe me varre fëmijësh e të rriturish, mund të ketë dhe varre familjare. Materiali kockor do të tregojë më shumë detaje”, u shpreh Memisha.