Arrestohet burri i ish-ministres së Ramës, dalin pamjet kur policët e shtrijnë përtokë

Ditën e sotme Policia e Kosovës ka arrestuar kryetarin e PSD të këtij shteti Dardan Molliqaj si dhe 7 aktivistë të tjerë të kësaj force politike.

Kujtojmë që Molliqaj është njëkohësisht bashkëshorti i Besa Shahinit, e cila ka shërbyer si ministre e Arsimit në qeverinë e Edi Ramës.

Po ashtu ai ka qenë dikur pjesë e “Lëvizjes Vetëvendosje” nga e cila u largua duke themeluar PSD-në.

Arrestimet kanë ardhur pas një proteste të zhvilluar para Ministrisë së Drejtësisë ku aktivistë të PSD shkruan me spraj mbi makina fjalën “zhvatës”.

Protesta u zhvillua në hapësirat pranë ndërtesës së qeverisë për të kundërshtuar “tiketat ngjitëse”, ku qytetarët e Kosovës duhet të paguajnë 5 euro shtesë për regjistrimin e automjeteve.

“Sot rreth orës 12:00 në rrugën “Ukshin Hoti” në Prishtinë, një grumbull personash kanë zhvilluar një aktivitet të paparalajmëruar. Si pasojë e veprimeve të tyre me shkruarjen e grafiteve, janë dëmtuar disa vetura”, thuhet në njoftimin e Policisë.

Sipas njoftimit të Policisë së Kosovës, “Të njëjtit  vazhdimisht  kanë shfaqur shenja të agresivitetit, veprimeve të ulëta të kontaktit fizik me pjesëtarë të policisë,  shpërfilljes së urdhrave të zyrtarëve policor si dhe pengim të tyre në kryerjen e detyrës zyrtare”.