Vaksinimi në Shqipëri/ Manastirliu jep njoftimin e rëndësishëm për qytetarët mbi 18 vjeç

Nga stadiumi “Air Albania” ku ka ndjekur procesin e vaksinimit, ministrja e Shëndetësisë Ogerta Manastirliu ka njoftuar se ditën e hënë nis  nis java e vaksinimit të hapur për të gjithë qytetarët mbi 18 vjeç.

Ata mund të paraqiten me kartën e identitetit në pikën më të afërt të vaksinimit.

“Pas mbërritjes së 340,000 dozave të vaksinave, kemi vendosur të kthejmë sërish ditët e hapura të vaksinimit, sipas planit të vaksinimit dhe rekomandimeve të ekspertëve të shëndetit publik. Do të jenë datat, nga dita e hënë e javës që hyjmë, deri në datë 25 korrik. Do të jetë java e parë e hapur e vaksinimit për të gjithë qytetarët +18 vjeç, në të gjitha qendrat shëndetësore, në pikat e vaksinimit masiv, duke shkuar edhe derë më derë. Do të jemi në komunitet për të realizuar këtë vaksinim të popullatës +18 vjeç në këtë javë të vaksinimit”, tha Manastirliu, ndërsa ka ftuar qytetarët +18 vjeç të vaksinohen përgjatë këtyre ditëve.

Duke bërë me dije se ditë dhe javë të vaksinimit të hapur do të ketë përgjatë gjithë verës, Manastirliu tha se do të vijojë furnizimi me vaksina anticovid. “Aktualisht në Shqipëri janë më shumë se 1 milion e 500 mijë doza vaksine të mbërritura. Ndërkohë që të hënën ne presim dhe rreth 32 mijë doza të vaksinës Pfizer, për të vijuar me planin e vaksinimit dhe për ta zgjeruar akoma më tej”, -tha Manastirliu.