LIGJET E BIZNESIT
Avokat Spartak Ngjela paralajmëroi dje se në shtator do të ketë një goditje të madhe në Shqipëri përsa i përket luftës anti-korrupsion.
Ai tha se gjithçka do të lidhet me Kuvendin e ri teksa deklaroi se ka deputetë të dalë nga këto zgjedhje që janë krerë të korrupsionit. Sipas avokatit ata nuk do të kenë mundësi të futen në Parlament. “Krerët e korruptuar të politikës shqiptare janë të kapur nga Moska e Beogradi dhe, pikërisht ky është sekreti i kësaj kohe, sepse këta krerë, pasi i vodhën shqiptarët, tani po kërkojnë destabilizimin e Shqipërisë.
Në fakt, asgjë nuk mund të bëjnë dot: janë të gjithë të skeduar dhe po kuptohet se janë nën kontroll. Që nga ky muaj, kur filloi goditja që po vijon, e deri në fund të shtatorit, kuptohet gjithashtu se në Shqipëri do të ketë goditje antikorrupsion në spektër të gjerë. Dhe gjithçka ka lidhje me Kuvendin e ri, që pritet të mblidhet në këtë shtator. Të korruptuarit e niveleve të larta që kanë dalë deputetë në zgjedhjet e fundit elektorale, nuk mund të lejohen që të jenë deputetë të Kuvendit të Shqipërisë. Nëse ata do të hyjnë në Parlament, nuk dihet se çfarë mund të ndodhë me reformën antikorrupsion në Shqipëri”, tha ai.
Po ashtu Ngjela u shpreh se shpallja “non grata” e zyrtarëve është një pengesë për të qenë pjesë e Kuvendit. Sipas avokatit, do të fillojnë procedimet penale sa i përket korrupsionit. “Kurse, dihet se, pengesa për të qenë ligjvënës në Kuvendin e Shqipërisë, vjen normalisht sipas ligjit të dekriminalizimit, për të gjithë ata që do të shpallen non grata në Amerikë; dhe për të gjithë ata të tjerët, kundër të cilëve do të fillojë procesi penal, duke qenë të akuzuar për korrupsionin. Ky është një proces që tani sapo ka filluar. Prisni dhe shikoni”, tha ai.
Ngjela flet për luftën antikorrupsion
Nga ana tjetër, Ngjela u shpreh se në Shqipëri do të goditen të gjithë keqbërësit pasi arrestimet e ditëve të fundit tregojnë qartë nisjen e luftës antikorrupsion. Ngjela deklaroi se ata që e kanë shkatërruar Shqipërinë nuk do të shpëtojnë dot teksa mori shembullin e ish-kryeministrit Sali Berisha. Avokati tha se ashtu si Berisha, do të shpallen “non grata” dhe plot zyrtarë të tjerë.
Sipas tij, ata do të jenë “non grata” edhe në Kuvend veçse në Amerikës. “Historia e Shqipërisë do të marrë ngjyrën e të vërtetës dhe brenda saj, shpejt do të goditen të gjithë keqbërësit. Madje, ajo ka filluar, sepse arrestimet e ditëve të fundit, kuptohet që janë në vetvete preludi i luftës antikorrupsion në Shqipëri. Ata që shkatërruan Shqipërinë me urdhër nga pushtuesit e tokave shqiptare, në vitet 1992-1996, nuk do të shpëtojnë dot. Kurse, shqiptarët e ndershëm po presin vijimin e emrave për personat e korruptuar që do të dalin “non grata” në Shtetet e Bashkuara, njëlloj si Berisha. Këta janë i njëjti grup i errët antishqiptar i dokumentuar tashmë, por shqiptarët i duan këta të jenë “non grata” në Amerikë, por “non grata” edhe në Kuvendin e Shqipërisë, sepse janë shumë deputetë në mesin e tyre”, tha ai.
