U përfol për paqe mes presidentit dhe kryebashkiakut/ Presidenti dënon “me forcë” incidentet e policëve në Tiranë  

Presidenti Ilir Meta dënon me forcë sjelljen e disa prej punonjësve të Policisë Bashkiake të Tiranës.

Zërat për një takim të fshehtë midis Metës dhe Erion Veliajt në Hungari, për “paqe”, duket se janë shuar shumë shpejt. Flitej se Presidenti dhe kryebashkiaku i Tiranës ishin takuar në një ceremoni në Budapest, për vendosjen e bustit të Skënderbeut.

Mirëpo, i ndikuar nga ngjarjet e fundit të policëve bashkiakë, Meta ka reaguar ashpër dhe duket se shuan çdo zë për “paqe” me Erion Veliajn. Ai dënon publikisht, punonjësit në varësi të kryebashiakut.

Shënimi i Presidentit Meta

Dënoj me forcë sjelljen joprofesionale, shproporcionale, të dhunshme dhe të dënueshme ligjërisht të disa punonjësve të Policisë Bashkiake Tiranë ndaj të moshuarve, shitës ambulantë.

I bëj thirrje Bashkisë Tiranë, që në mënyrën më të papërgjegjshme ka dhënë edhe në të kaluarën e afërt shembullin më të keq të marrëdhënies së pushtetit vendor me qytetarët, të bëjë kujdes maksimal në zbatimin me përpikmëri të ligjit dhe të ketë parasysh se liritë dhe të drejtat themelore të njeriut garantohen nga Kushtetuta e Republikës së Shqipërisë në çdo kohë dhe duhen respektuar nga çdo institucion dhe autoritet.

Urdhëruesit dhe autorët e këtyre akteve arbitrare, që po kthehen në një fenomen të përsëritur dhe thellësisht shqetësues për banorët e kryeqytetit, meritojnë të marrin përgjigjen e menjëhershme nga drejtësia!