Gruaja e Presidentit të Haitit: E vra në sa hap e mbyll sytë për arsye politike

Për herë të parë, gruaja e Presidentit të vrarë të Haitit Jovenel Moise theu heshtjen për ngjarjen shokuese, dhe tha se persona të armatosur mësynë në shtëpinë e çiftit në Port-au-Prince, dhe e gjitha ndodhi ‘sa hap e mbyll sytë’.

Moise e cila mbeti e plagosur postoi një mesazh me zë në faqen e saj në Twitter:

“Sa hap e mbyll sytë, mercenarët hynë në shtëpi dhe masakruan burrin tim me plumba. Ky akt nuk ka emër, sepse duhet të jesh një kriminel i pakufishëm për të vrarë një president si Jovenel Moise, madje pa i dhënë mundësinë të thotë një fjalë të vetme”.- tha Martine Moise.

Ajo tha se mercenarët u dërguan për të vrarë burrin e saj “për shkak të rrugëve, ujit, energjisë elektrike dhe referendumit si dhe zgjedhjeve në fund të vitit në mënyrë që të mos ketë tranzicion në vend”.

Presidenti i Haitit, Moise u vra më 7 korrik në rezidencën e tij në kryeqytetin Port-au-Princ. Policia e Haitit njoftoi se Presidentin e vrau një grup prej 28 mercenarësh të huaj, mes të cilëve 26 janë kolumbianë.