Tragjike në Durrës/ Shpërthen goma e kamionit, humb jetën punonjësi 20-vjeçar 

Një ngjarje e rëndë është regjistruar këtë mëngjes në Durrës. Një 20-vjeçar, punonjës në një gomisteri ka humbur jetën, ndërsa ka qenë duke punuar për të rregulluar gomën e një kamioni.

Burime zyrtare bëjnë me dije se ngjarja ka ndodhur rreth orës 08:50, në lagjen nr.14/1, Kënetë, në ambientet e një gomisterie, ku 20-vjeçari me inicialet R.T. ka qenë duke rregulluar një gomë të një kamioni e cila ka shpërthyer. Ai ka pësuar lëndime të shumta në trup e si pasojë e plagëve të marra ka ndërruar jetë.

Grupi hetimor ndodhet në vendin e ngjarjes dhe po punon për zbardhjen e rrethanave të ngjarjes.