Me mbi 120 km në orë/ Del video e Audit në tunelin Tiranë-Elbasan, pamjet e aksidentit tragjik

Në dhjetor të 2020 një aksident tragjik ndodhi në tunelin e rrugës nacionale “Elbasan-Tiranë”.

Bëhet fjalë për një automjet tip “Audi” i cili përplasi 3 makina të tjera për shkak të shpejtësisë së lartë.

Pas 7 muajve, sot është publikuar video e marrë nga brenda tunelit.

Pamjet u publikuan nga emisioni “Uniko”. Sipas ekspertit Mamir Hodo, i ftuar në studion e emisionit Uniko, automjeti Audi ka qenë me të paktën mbi 120 km/h, disa herë më shumë se sa shpejtësia e lejuar brenda tunelit

Nga përplasja e rëndë mbeti i plagosur rëndë drejtuesi i një automjeti tip Ford, i cili edhe sot e kësaj dite vuan pasojat e aksidentit të 24 Dhjetorit 2020.

Për shoferin e automjetit Audi, eksperti Mamir Hodo thotë se duhen bërë ndryshime në Kodin Rrugor dhe t’i hiqet patenta për të paktën 4 vite.

Në pamjet e kamerave të sigurisë brenda tunelit, duken qartë manovrat e rrezikshme që automjeti Audi bën për të shmangur përplasjen me automjetet e tjera. Por për shkak të shpejtësisë tejet të lartë, impakti është i pashmangshëm.