Kërcënimi i Kim Jong Un: Do dërgohet në kamp përqëndrimi kushdo që dëgjon muzikë të Koresë së Jugut

Midis rritjes së influencave kulturore nga Korea e Jugut, Kim Jong Un ka marrë përsipër nisjen e një fushatë te re shtypjeje ndaj adhuruesve të muzikës moderne në Korenë e Veriut.

Lideri komunist 37-vjeçar ka ashpërsuar dënimet ndaj muzikës “perverse” moderne nga Korea e Jugut, e njohur ndryshe si K-pop. Fushata sekrete anti-muzikë e autoriteteve të Penianit ka dalë së fundmi në dritë me disa dokumente të nxjerra nga Veriu, të cilat janë publikuar në të përditshmen e Seulit, Daily NK, dhe më pas në Neë York Times.

Despoti i cili raportohet se kohët e fundit ka rënë në peshë, i quante importet e muzikës nga jugu si një “kancer agresiv” që korrupton të rinjtë e pastër koreano-veriorë, veshjet, stilin e flokëve, gjuhën si dhe sjelljen e tyre.

Teksa tenton promovimin e një stili  tërësisht personal kulturor për vendin, Kim ka prezantuar edhe ligjet e reja në fillim të vitit, duke kërkuar që kushdo që kapet duke ndjekur apo zotëruar përmbajtje kulturore koreano-jugore, të dënohet deri më 15 vjet burg dhe punë të detyruar.

Për këtë shkelje dënimi i mëparshëm ishte 5 vjet. Sikur kjo të mos mjaftonte, kontrabandistet e muzikës K-pop në veri mund të përballen me dënim me vdekje. Në maj sipas raportimeve një qytetar u vra me pushkatim në Korenë e Veriut për kontrabandë muzike dhe zbavitjesh të tjera nga Jugu.

I quajtur shpesh nga mediat perendimore “Gangsteri i mbretërisë së tij eremite”, Kim ka ashpërsuar kohët e fundit retorikën e tij anti-kapitaliste, pasi rinia vendase po bëhet gjithnjë e më e influencuar nga stilet perëndimore.