LIGJET E BIZNESIT
Fanella e ekipit të Ukrainës në Euro 2020 është bërë shkak që ky shtet të ketë një përplasje diplomatike me Rusinë.
Kombëtarja që drejtohet nga Andriy Shevchenko ndodhet në grupin C, përballë kundërshtarëve si Holanda, Maqedonia e Veriut dhe Austria.
Ndeshja e parë do të zhvillohet me 13 qershor kundër tulipanëve të De Boer.
Presidenti i federatës ukrainase të futbollit, Endri Pavelko, deklaroi se futbollistët do të kenë “fanella speciale” dhe publikoi fotografitë e uniformave verdhë e blu, si flamuri kombëtar, në të cilat është vizatuar harta e Ukrainës përfshirë dhe Krimenë, e aneksuar nga Rusia; por dhe rajonet e Donetsk dhe Lugansk të kontrolluara nga separatistët.
Fotografitë shoqëroheshin nga fjalët: Lavdi për Ukrainën! Lavdi për heronjtë tanë! Pevelko u shpreh se do të jetë pikërisht kjo hartë që do i japë forcë lojtarëve, të cilët do të luftojnë për të gjithë vendin. Zëdhënësja e ministrisë së jashtme ruse u tall me uniformat duke thënë se ishte sulmuar territori i Ukrainës dhe ai rus i Krimesë.
Sipas saj, kjo fanellë krijon iluzionin e të pamundurës. Në fund ajo theksoi se organizatorët e Euro 2020 dhe tifozët duhet të dinë se motoja e zgjedhur nga ukrainasit është një moto naziste. Ankesa e rusëve ka dhënë efekt dhe UEFA ka marrë një vendim në lidhje me këtë temë delikate.
Qeveria Europiane e Futbollit ka urdhëruar kombëtaren ukrainase të ndërrojë fanellën zyrtare, pasi konsiderohet si politike për shkak të përfshirjes së Krimesë. Vendimi i UEFA-s ka gëzuar Rusinë. Me anë të një komunikate të shkurtër zyrtare, Ministria e Jashtme e shtetit të madh lindor deklaron se ka mbetur e kënaqur me imponimin e UEFA-s ndaj Ukrainës.
