Shembja e tavanit në Pediatri/ Reagon QSUT: Ja si paraqitet gjendja shëndetësore e 2 fëmijëve

Pas incidentit të ndodhur sot në Spitalin Pediatrik të Tiranës ku u shemb suvaja dhe ngjarja u raportua më pas nga Partia Demokratike, ka ardhur dhe reagimi i QSUT.

Ky institucion gjatë një deklarate për mediat shprehet se : “një incident ka ndodhur sot paradite në Shërbimin e Pediatrisë së Specialiteteve 1 në QSUNT, në pavionin ekzistues, si pasojë e shkëputjes së një pjese suvaje nga tavani i një dhome”.

Menjëherë personeli mjekësor ka ekzaminuar dy pacientët e vegjël që ndodheshin në dhomë dhe gjendja e tyre aktualisht paraqitet e mirë, pa dëmtime, shton QSUT.

Një grup ekspertësh nga Drejtoria e Shërbimeve Mbështetëse e QSUNT, po kryen një vlerësim teknik për shkaqet e incidentit për marrjen e masave të menjëhershme, thuhet më tej në njoftim.