Rrëfehet Julian Deda: Pse e refuzova mandatin e deputetit nga Basha, si duhet të zgjidhet lideri i ri i PD

Aktori i humorit Julian Deda ka treguar për herë të parë pse nuk pranoi mandatin e ofruar nga kryetari i PD-së, Lulzim Basha.

I pyetur në ‘FitStation’, në News24,për zgjedhjen e liderit të PD-së në 13 qershor, Juli u përgjigj se drejtimin e një partie nuk ta jep askush, atë duhet ta fitosh vetë nëpërmjet ndryshimit që ofron.

“Nuk refuzova se isha i fundit në listë, as se jam mërzitur me Bashën. Mund ta quajmë refuzim, por nuk ishte nga këto refuzime të tipit “nuk dua unë”, thjesht ishim dakord të mos përfshihesha. Unë nuk jam tipi të shkoj në parlament dhe të ul e të ngre kartonat. Unë kam dëshirë të jem aktiv, nuk e mohoj që një ditë mund të jem deputet, por për momentin nuk e shoh të aryeshme.

Të gjithë kanë të drejtë të kandidojnë në bazë të kritereve që duhet të plotësojnë. Nëse dikush do të bëhet kryetar i Partisë Demokratike, duhet ta marrë atë vend, jo t’ja japin. T’i thuash tjetrit ik ti të vijë unë, është të ta japin vendin, jo, drejtimin e PD-së duhet ta marrësh me votë, duke bindur demokratët, duke treguar që programi që ti ke vlen më shumë. Në këtë sens gara është plotësisht e hapur. Kjo lufta ik ti të vi unë, nuk është çështje karrigeje kjo është çështje organizimesh, ka të bëjë me njerëzit”, u shpreh Juli.