LIGJET E BIZNESIT
Këtë të premte, bluzat e bardha të spitalit të Fierit janë ngritur në protestë në lidhje me rastin e publikuar para pak ditësh, ku Ardit Klima ka denoncuar në emisionin investigativ “Stop” dhunën që mjekët e këtij spitali kishin ushtruar ndaj tij.
Mjeku Enver Halili që ka qenë një nga personat i cili është dëgjuar teksa ka ushtruar dhunë ndaj të riut, Ardit Klima është shprehur se ai ishte një person me probleme mendore dhe që ushtronte dhunë psikologjike dhe fizike të vazhdueshme ndaj personelit mjekësor.
“Nuk e kam menduar se do të isha në këtë situatë të vështirë. Dua ti kërkoj falje doktor Ndricim Kallashit që është përfshirë në këtë situatë vetëm në momentin e fundit për të mbrojtur jetën time dhe të tij ndaj një kërcënimi të sigurt. Ardit Klima ka qenë shantazhues, provokues çdo ditë në spital jo vetëm me mua por me të gjithë. Në momentin që unë kam reaguar mendoni ca situatë kam qenë. Ka qenë një situatë ekstreme. Po, pacienti ka ushtruar dhunë verbale dhe më pas fizike. Është denoncuar në polici dhe gjërat nuk janë bërë në kohë. Dy herë është marrë në polici dhe të dyja rastet është kthyer në spital. Personi ka shkuar në familje dhe më pas është rikthyer në spital dhe ditën tjetër ka vazhduar të kërcënojë persona të tjerë”, tha Halili.
Po ashtu, një nga mjekët e pranishëm është shprehur se ky rast është denoncuar dy herë në polici por që nuk kanë marrë asnjë përgjigje. Ai shton se kanë një video të cilën do ja vendosin në dispozicion organeve kompetente për zbardhjen e plotë të ngjarjes.
“Ushtronte dhunë të rregullt mbi të gjithë personelin për gati një muaj. Në qoftë se ai ka audio ne kemi një video. Vetëm atë ditë jam njohur me këtë rast i kemi dërguar Ministres, Drejtorisë një peticion se çfarë është bërë. Nuk është ushtruar dhunë është bërë vetëm neutralizim”, tha ai.
