“Jemi në kohën e duhur” Adriatik Llalla u dënua me 2 vite burg, avokati tregon lëvizjen që po përgatisin

Para pak ditësh Gjykata e Posaçme Kundër Korrupsionit dhe Krimit të Organizuar dënoi me dy vite burg dhe sekuestrim pasurie ish-kryeprokurorin Adriatik Llalla.

Ndërkohë avokati i tij, Sokol Hazizaj tha për programin “Breaking”, se janë në afatin e duhur kohor për të ankimuar këtë vendim, madje e cilësoi atë si të padrejtë.

“Jemi në afatin kohor të duhur për të ankimuar vendimin, i cili është i padrejtë. E di kush është meraku im? Vendimmarrje të tilla, duken si veprimtari të qëllimshme kundër drejtësisë. Ne do të bëjmë ankimimin në Gjykatën e Apelit, e cila bën balancimin e provave tona dhe provave akuzuese. Ankimimi bëhet për t’ia dhënë provat një gjykate më të lartë e më profesionale”, tha avokati Hazizaj.

Ndërsa kur e pyetën se pse nuk i sugjeroi Llallës kur u shpall “non grata” nga SHBA që të niste një proces gjyqësor si ish-kryeministri, Sali Berisha, Hazizaj tha:

“Unë e mbroj Llallën nga akuza penale për të cilën akuzohet. Avokati nuk mbron nga marrëdhëniet politike, por nga akuzat”.