“Pa ëndërr një ditë më parë” Banorja e fshatit përlotet për 16 vjeçarin që humbi jetën në aksident: Më tha nuk jam mirë

Mbrëmjen e djeshme një aksident fatal ndodhi në urën e Ballshit, ku humbi jetën 16 vjeçari Agim Hoxhaj.

Ndërkohë një banore e fshatit në Mallakastër ka treguar momentet e fundit të të riut.

Ajo u shpreh për mediat se një ditë para ngjarjes, Agim Hoxhaj i kishte thënë se nuk ndihej mirë pasi kishte parë një ëndërr.

“Unë jam kuzhiniere tek Gjanica. Ai dje pasdite ka ardhur tek shtëpia ime, më tha mua ‘nuk jam mirë, do vemi në një vend të mirë’. I thashë tek cili vend i mirë. Më tha ‘do vemi në Drenie se unë nuk jam mirë’. ‘Kam parë ëndërr’ tha. Unë i thashë nuk e di mirë se jetoj në Fier, megjithatë di një teqe këtej që e ka ngritur xhaxhi Agroni, megjithatë do pyesim i thashë. ‘Unë nuk jam mirë’ tha, ‘unë kur kam pasur babin në burg, kam vajtur në Drenovë kam ndezur një qiri dhe babi më doli për tre ditë’ (qan). Na ka prekur shumë si kolektiv, nuk harrojmë”, tregon gruaja.

Ajo tregon se shumë vite më parë i ka vdekur dhe bashkëshorti në një aksident në të njëjtin vend, duke vijuar të lutet për shpirtin e të riut, për të cilin thotë se donin të gjithë. Më tej, ajo tha se 16 vjeçari punonte si kamarier në hotelin ku qëndrojnë lojtarët e ekipit të Bylisit, kurse ajo vetë është kuzhiniere.

“Çunat e sportit nuk hëngrën bukë sot në mëngjes, të gjithë po qanin”, tregon banorja.

“Unë sot në mëngjes e kam marrë vesh. Ndeza një qiri për shpirtin e atij çunit, për shpirtin e atij 16-vjeçari se kam fëmijë vetë, ma ka lënë burri çunin 10 muajsh. Është vrarë shpejt burri im këtu, ka 30 vjet. Aksident në makinë. Ishte fati. Prandaj erdha. E kishte ndjerë situatën djali për atë Zot, o Zot se kemi mbajtur Ramazan, ç’bëri ai djalë. Ishte djalë i shkathët, nuk e prishte njëherë gojën, të gjithë e donin në kolektiv, në punë. Të gjithë e urdhëronim ne atë, e donim shumë. I thosha do të rrisim, do të martojmë, do të bëjmë dhëndër. E puthja nga zverku se nga korona. Na është dhimbsur shumë, po qan i gjithë fshati, gjithë kolektivi. Çunat e sportit nuk hëngrën bukë sot në mëngjes, të gjithë po qanin”, vijon ajo.

Kujtojmë se Agim Hoxhaj 16 vjeç, humbi jetën mbrëmjen e djeshme si pasojë e një aksidenti rrugor në hyrje të qytetit të Ballshit. AI udhëtonte me motor bashkë me shokun e tij, 19 vjeçarin Ledion Alushaj, i cili ndodhet në spital në gjendje të rëndë për jetën. Ata u përplasën me një mjet tip “Ford”.