Nënkomisari me inicialet E.S., 39 vjeç, banues në Korçë është vënë në pranga mbrëmjen e sotme. Lajmin e bën të ditur ‘SHÇBA, e cila në njoftimin thotë se e ndaloi oficerin e policisë me dyshimin për vjedhje duke shpërdoruar detyrën
Arrestimi i nënkomisarit ka ardhur pas një denoncimi mediatik. Pas bërjes publike të rastit të tij, Shërbimi për Çështjet e Brendshme dhe Ankesat (SHÇBA) arrestoi në flagrancë punonjësin e Policisë, që ishte me detyrë pranë Prokurorisë së Rrethit Gjyqësor Korçë.
Akuzat ndaj tij janë për veprat penale “Vjedhja duke shpërdoruar detyrën” dhe “Falsifikim i formularëve”.
Në cilësinë e provës materiale u sekuestrua telefoni që i përkiste një shtetasi të arrestuar më parë, e sipas vendimit të Prokurorisë oficeri duhet t’ja kthente në cilësinë e sendit të bllokuar në momentin e ndalimit.
Mësohet se drejtoria Vendore e Policisë Korçë e pezulloi dhe nisi menjëherë ecurinë disiplinore për shkelje të rëndë të detyrës ndaj oficerit të vënë nën akuzë.
