VIDEO/ Çfarë po u mësojmë këtyre të rinjve?! Në këtë filmim janë zyrtarët dhe politikanët e nesërm. Atyre u edukohet gënjeshtra, dyfytyrësia, mungesa e përgjegjësisë ligjore

Ligjet dhe rregullat janë për të tjerët, për atë popullin budall atje jashtë, jo për ne këtu brenda. Ne jemi “familja” mbi ligjin, sepse ne jemi pushteti, ne na mbron partia, kryeministri…

Kjo është ajo që u edukohet të rinjve në këtë video.

Nuk ka aspak rëndësi nëse bëhet fjalë për PS, PD, LSI apo ndonjë parti tjetër. E kanë të gjitha këtë sjellje.

Problemi është i mprehtë, jo thjesht partiak; ai mbart pasoja të rënda sociale, sepse kjo sjellje ndikon drejtpërdrejt në formimin e këtyre të rinjve që sot militojnë në struktura partiake.

Lidhet ngushtësisht me të ardhmen, që themi se e dëshirojmë ndryshe nga e sotmja. Sepse në këtë turmë janë politikanët dhe zyrtarët e nesërm.

Atyre u mësohet gënjeshtra.

U mësohet dyfytyrësia, mungesa e përgjegjësisë ligjore, mungesa e transparencës; u mësohet që ka dy standarte të sjelljes, një para medias apo publikut dhe një “brenda partisë”, u mësohet madje edhe të sulmojnë shokët që mund t’i thyejnë këto udhëzime antiligj dhe antimoral.

Nuk ka rëndësi cili portal e transmeton dhe pse e transmeton; i njohim dhe i dimë arsyet, por për fat të keq kjo nuk e ndryshon të vërtetën që shfaqet e qartë dhe brutale në këto filmime.

A e pyesin veten këta edukatorë me mikrofonë në duar: bashkëmoshatarët e këtyre të rinjve jashtë kësaj salle, çfarë mendojnë kur shohin këtë video nëpër portale? Po prindërit e tyre?

Ndiqni videon dhe jepni gjykimin tuaj, por jo me patetikën militante dhe mediokre të njërës apo tjetrës parti apo partiçkë, por me frymën e përgjegjësisë për të ardhmen politike të vendit/ gazeta Dita