Rigjykim i dosjes së Tahirit/ Reagon për herë të parë ish-ministri: Vendim në emër të politikës

Ish-ministri i Brendshëm, Sailmir Tahiri ka vendosur të reagojë për herë të parë ditën e sotme në lidhje me vendimin e Gjykatës së Posaçme të Apelit për Korrupsionin dhe Krimin e Organizuar, e cila riktheu për rigjykim dosjen e ish-deputetit.

Tahiri ka ironizuar vendimin e Gjykatës së Apelit, ku në krye shkruhet “Vendim në emër të Republikës”. Ish-ministri e ka qarkuar dhe shkruan, në postimin e tij në Facebook, “Në emër të Politikës”.

Reagimi i Tahirit lë të kuptohet se beteja e tij me drejtësinë vazhdon, edhe pse “Në emër të Politikës”.

Vendimi

Gjykata e Posaçme e Apelit ka zbardhur vendimin e plotë për ish-ministrin e Brendshëm, Saimir Tahirin, vendim i cili riktheu për rigjykim dosjen e shumëpërfolur në vend.

Sipas Gjykatës së Posaçme të Apelit kundër Korrupsionit dhe Krimit të Organizuar, Prokuroria është kontradiktore në hetimet e saj, pasi ka ngritur akuzë të re ndaj Tahirit për “kultivim narkotikësh”. Apeli i Posaçëm e cilëson të gabuar edhe vendimin e Gjykatës së Shkallës së Parë, duke u shprehur se ka gabuar në rikualifikimin e veprës penale.

Po ashtu, thuhet në vendim se ish-ministri Tahiri dhe vartësi i tij Jaeld Çela nuk iu dha mundësia të mbroheshin për akuzën e “shpërdorimit të detyrës”. Gjykata e cilëson si jopërfundimtar vendimin që është marrë në Katania të Italisë ndaj grupit kriminal për të cilën është vënë nën akuzë edhe ishministri, pasi nuk plotëson kushtet.

Nga ana tjetër, janë shkelur disa dispozita nga Prokuroria për akuzat e reja ndaj Tahirit dhe Jaeld Çelës, si dhe në rikualifikimin e veprave penale nga Gjykata e Krimeve të Rënda, e cila ka dhënë edhe një vendim më parë, por që Gjykata e Posaçme e Apelit e hodhi poshtë. Tashmë çështja e Saimir Tahirit pas 3 vitesh do të rikthehet për rigjykim nga fillimi teksa ish-ministri e ka cilësuar si të padrejtë këtë vendim dhe një zvarritje të qëllimshme.