“Kompania e preferuar e qeverive” Murrizi zbulon tenderin e Ministrisë së Brendshme: Babëzi dhe në pandemi

Me tone të ashpra ka folur sot në seancën plenare deputeti i opozitës së re Myslym Murrizi.

Ai ka hedhur akuza të forta në drejtim të mazhorancës, duke thënë se babëzia e tenderave nuk u ndal as në kohën e pandemisë.

“Babëzia juaj nuk u kënaq me tendera edhe në kohë pandemie.

Në datë 14 korrik ministria e Brendshme ka bërë një tender 23 milion euro për uniformat, tender i nisur para një viti, i ngecur në ingranazhet e korrupsionit, e bëtë tender unik pa vite. Në garë tre kompani. Kompania turke ofroi 4.2 mln euro më pak dhe shpallët fituese kompaninë DE e cila ka në objektin e saj sipas regjistrimit në QKB, gërmime dheu dhe shkëmbime tregtare. E ulët 30% kategorinë e artikujve që ofron dhe nuk keni ulur asnjë qindarkë nga çmimi. Kjo kompani çuditërisht është e preferuara e të gjitha qeverive.”-tha Murrizi.

Më tej, ai theksoi se “Tenderat duhet të jenë objekt i hetimit të SPAK dhe se duhet ndarë një herë e mirë shapi nga sheqeri”.