FOTOT/ Kaos në kufirin grek, gaz lotsjellës ndaj grave e fëmijëve

Një situatë e trazuar dhe kaosi shihet pranë kufirit grek me Maqedoninë Veriore.

Më shumë se 500 persona, duke përfshirë edhe familje me fëmijë, janë mbledhur në një fushë misri, dhjetë kilometra në perëndim të Selanikut dhe po planifikojnë të kalojnë kufirin, për të vazhduar rrugëtimin drejt Gjermanisë

Policia hodhi gaz lotsjellës kundër nënave dhe fëmijëve, ndërsa emigrantët mësynë një stacion grek dhe u përleshën me trupat në kufi. Përleshjet shpërthyen, pas thashethemeve në mediat sociale se kufiri për migrantë do të hapet.

Sipas njoftimeve, disa migrantë jashtë kampit Diavata hodhën gurë në drejtim të policisë, e cila më pas u përgjigj me gaz lotsjellës. Qindra njerëz u tërhoqën zvarrë.

“Njerëzit duan që qeveria të hapë kufijtë në mënyrë që të shkojnë në një tjetër vend. Këtu ndihemi shumë keq dhe ka shumë problem”, tha një emigrant nga Iraku.

Në Athinë refugjatët u panë të shtrirë në shinat e trenit, ndërsa thërrisnin “Gjermani” dhe “Hapni kufijtë” në një protestë tjetër në stacionin kryesor hekurudhor të kryeqytetit grek.

Atyre iu është thënë të përpiqen ta kalojnë kufirin për të vazhduar rrugën drejt vendeve të Ballkanit, por ky korridor i emigrantëve u mbyll në vitin 2016.