Ambasadori Eric Wendt zbardh 3 prioritetet e SHBA në Shqipëri

Ambasadori i ri i Shteteve të Bashkuara të Amerikës në Shqipëri, Eric Wendt, ka bërë të ditura tri prioritetet kryesore të bashkëpunimit mes dy vendeve gjatë mandatit të tij në Tiranë. Në një mesazh drejtuar publikut shqiptar, Wendt ka vendosur në fokus forcimin e bashkëpunimit në fushën e mbrojtjes, rritjen e tregtisë dhe investimeve, si dhe luftën kundër krimit ndërkombëtar dhe korrupsionit.

Ambasadori i ka përmbledhur objektivat në tri drejtime: të bëhemi më të fortë, më të begatë dhe më të sigurt. Në fushën e mbrojtjes, ai theksoi rëndësinë e ndërtimit të kapaciteteve reale mbrojtëse dhe përmbushjes së përgjegjësive që u takojnë të dy vendeve si aleatë.

Sa i përket ekonomisë, Wendt u shpreh se do të kërkohen mënyra për të zgjeruar tregtinë, investimet dhe mundësitë ekonomike, me përfitime të ndërsjella për qytetarët dhe bizneset amerikane e shqiptare.

Ndërsa prioriteti i tretë lidhet me sigurinë, përmes bashkëpunimit në luftën kundër krimit ndërkombëtar dhe mbrojtjes së interesave të përbashkëta të dy vendeve.

Në mesazhin e tij, diplomati bëri të ditur gjithashtu se gjatë muajve të ardhshëm Ambasada Amerikane do të zhvillojë një vlerësim për të përcaktuar drejtimet e ardhshme të bashkëpunimit. Në këtë kuadër, ai parashikon vizita në disa qytete dhe zona të Shqipërisë, si dhe takime me përfaqësues të politikës, qeverisë, strukturave ushtarake, biznesit dhe sistemit të drejtësisë.

Wendt shprehu gjithashtu interesin për t’u takuar me qytetarë shqiptarë dhe amerikanë, duke theksuar se synon të dëgjojë dhe të diskutojë ide të reja për forcimin e marrëdhënieve dypalëshe.

Në mesazhin e tij të parë, ambasadori vlerësoi mikpritjen e shqiptarëve dhe kujtoi bashkëpunimin e mëparshëm me Forcat Speciale Shqiptare gjatë shërbimit të tij ushtarak. Ai e cilësoi marrëdhënien mes dy vendeve si një miqësi të ndërtuar mbi histori të përbashkët dhe respekt të ndërsjellë.

“Bashkë mund të realizojmë gjëra konkrete. Ecim së bashku. Shkojmë së bashku”, përfundoi mesazhin ambasadori amerikan.

 

Mesazhi i plotë i Ambasadorit të SHBA, Eric Wendt

“Ndërsa nis detyrën time si ambasador i Shteteve të Bashkuara të Amerikës në Shqipëri, dëshiroj të shpreh mirënjohjen time për Presidentin Trump dhe Sekretarin Rubio për besimin e treguar ndaj meje. Gjithashtu, dëshiroj të falënderoj popullin shqiptar për mikpritjen e ngrohtë që i keni rezervuar Shteteve të Bashkuara të Amerikës.

Gjatë shërbimit tim të mëparshëm ushtarak, së bashku me Forcat Speciale Shqiptare, si dhe gjatë udhëtimeve të mia nëpër Shqipëri, ku kam takuar qytetarë të zakonshëm shqiptarë, kam përjetuar personalisht faktin se shqiptarët janë një popull jashtëzakonisht mikpritës, punëtor dhe krenar.

Gjatë muajve të ardhshëm, nën drejtimin tim si ambasador, Ambasada e Shteteve të Bashkuara do të zhvillojë një vlerësim, i cili do të ndihmojë në përcaktimin e rrugës sonë përpara.

Në kuadër të këtij vlerësimi, mezi pres të udhëtoj drejt disa qyteteve dhe zonave të Shqipërisë, siç është praktikë e zakonshme diplomatike. Do të marr pjesë në takime të shumta me liderët e ndryshëm politikë që ju keni zgjedhur, si dhe me përfaqësues të qeverisë, drejtues ushtarakë, drejtues të biznesit, përfaqësues të sistemit të drejtësisë dhe drejtues të tjerë.

Gjithashtu, mezi pres të takohem me qytetarë të zakonshëm amerikanë dhe shqiptarë.

Së bashku do të diskutojmë mënyrat tradicionale, por edhe ide të reja dhe krijuese, për të bashkëpunuar në mënyrë sa më efektive në të ardhmen, duke u përqendruar në tri fusha kyçe me përfitim të ndërsjellë për Shtetet e Bashkuara të Amerikës dhe Shqipërinë.

E para është të bëhemi më të fortë. Ne bëhemi më të fortë duke ndërtuar kapacitete reale mbrojtëse dhe duke përmbushur pjesën tonë të drejtë të përgjegjësive si aleatë.

E dyta është të bëhemi më të begatë. Do të gjejmë mënyra për të rritur tregtinë, investimet dhe mundësitë, me përfitime të ndërsjella për amerikanët dhe shqiptarët.

E treta është të bëhemi më të sigurt. Do të bashkëpunojmë në luftën kundër krimit ndërkombëtar dhe për mbrojtjen e interesave tona të përbashkëta.

Ndërsa zhvillojmë këtë vlerësim gjatë muajve të ardhshëm dhe përcaktojmë një rrugë të përbashkët drejt një të ardhmeje më të fortë, më të begatë dhe më të sigurt, mezi pres gjithashtu të mësoj më shumë për popullin shqiptar, për historinë tuaj krenare dhe të përjetoj edhe një herë personalisht mikpritjen tuaj legjendare.

Jam vërtet i nderuar dhe i bekuar që kam mundësinë të shërbej në Shqipëri si ambasador i Shteteve të Bashkuara.

Shtetet e Bashkuara dhe Shqipëria ndajnë një histori të fuqishme, një miqësi dhe një respekt të thellë të ndërsjellë.

Së bashku mund të realizojmë gjëra konkrete.

Ecim së bashku. Shkojmë së bashku”.