Edhe pse në kohë pandemie, Operacioni Forca e Ligjit nuk e ka ndalur punën për goditjen e krimit të organizuar dhe pasurive të vëna në mënyrë të paligjshme.
Sot OFL është ndalur në Tiranë dhe u ka dërguar formularin e vetëdeklarimit të pasurisë tre subjekteve.
Mësohet se ata janë Denis Qordja, Fatjon Manabej e Shkëlqim Sharra, të cilët për 48 orë duhet të dorëzojnë formularin me pasuritë të cilat zotërojnë.
Të tre janë emra të njohur për drejtësinë, ku Fatjon Manabej është në kërkim në Itali si pjesë e një grupi kriminal. Denis Qordja (Dervishi) është dënuar më herët për shfrytëzim prostitucioni, ndërsa Shkëlqim Sharra është dënuar për trafik ndërkombëtar droge.
Këta individë, si subjekt i Ligjit Special, duhet t’u përgjigjen me shkrim brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme. OFL deklaron se është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
