Policia e Tiranës ka vënë në pranga një 60 vjeçar.
Mësohet se ai është identifikuar si shtetasi Petrit Haxhiu, dhe akuzohet pasi ka vënë tritol në banesën e komshiut të tij Blerim Haxhiu me të cilin është dhe i afërm.
Më pas lënda plasëse ka shpërthyer, duke shkaktuar dëme materiale.
Ngjarja ka ndodhur në fshatin Bastar i Mesëm, njësia administrative Zall Bastar, Tiranë.
Sipas informacioneve 60-vjeçari Haxhiu, ka qenë në gjendje të dehur në momentin që e ka kryer aktin, madje një natë më parë, dy kushërinjtë kanë qenë bashkë, duke konsumuar alkool.
Pas disa gotave, ata janë konfliktuar dhe 60-vjeçari i ka shkuar në banesë për t’i vënë tritolin.
NJOFTIMI ZYRTAR I POLICISE
Falë reagimit të menjëhershëm dhe veprimeve profesionale në vendngjarje, identifikohet dhe vihet ne pranga autori i vendosjes së lëndës plasëse në dritaren e banesës së shtetasit B. H. Sekuestrohen 3 kallëpe me lëndë plasëse, një fitil me detonator dhe 20 metra fitil zjarrpërcjellës. Specialistët për Hetimin e Krimit në Komisariatin Nr. 4, menjëherë pas ngjarjes së ndodhur në orët e para të mëngjesit të sotëm në fshatin Bastar i Mesëm, ku ishte vendosur një sasi lënde plasëse në banesën e shtetasit B. H., bënë të mundur zbardhjen e ngjarjes, identifikimin dhe kapjen e autorit.
Në përfundim të veprimeve u bë arrestimi në flagrancë, për veprat penale “Mbajtja pa leje e armëve dhe municioneve luftarake”, “Kanosja” dhe “Shkatërrimi i pronës”, i shtetasit P. H., 60 vjeç, pasi në fshatin Bastar i Mesëm, Njësia Administrative Zall Bastar, dyshohet se ka vendosur një sasi të vogël lënde plasëse në dritaren e banesës e shtetasit B. H., duke i shkaktuar dëme të lehta materiale. Gjatë kontrollit në banesën e shtetasit të arrestuar, shërbimet e Policisë gjetën dhe sekuestruan në cilësinë e provës materiale 20 metra fitil zjarrpërcjellës, një detonator dhe 3 kallëpe të dyshuara me lëndë plasëse. Materialet i kaluan Prokurorisë, për veprime të mëtejshme, për veprat penale “Mbajtja pa leje e armëve dhe municioneve luftarake”, “Kanosja” dhe “Shkatërrimi i pronës”.
