Kuvendi do të mblidhet sot në orën 10:00 në seancë plenare, ku në rendin e ditës është shqyrtimi në parim i projektbuxhetit të vitit 2027 dhe paketës fiskale. Të dyja nismat janë miratuar më herët në komisionet parlamentare dhe pritet të shoqërohen me debate politike në sallën e Kuvendit. Seanca pritet të zhvillohet në një klimë të tensionuar, pasi Partia Demokratike do të jetë e përfaqësuar me një numër të reduktuar deputetësh. 12 deputetë të opozitës janë përjashtuar nga punimet parlamentare, mes tyre kreu i grupit parlamentar Gazment Bardhi dhe sekretari i Përgjithshëm i PD-së, Flamur Noka.
Një ditë më parë, kryetari i Partisë Demokratike, Sali Berisha, deklaroi se opozita do të votojë kundër projektbuxhetit 2027. Ai e cilësoi hartimin e tij si një proces të zhvilluar në fshehtësi, duke pretenduar se dokumenti nuk është konsultuar. Projektbuxheti i vitit 2027 parashikon një total shpenzimesh prej rreth 10.7 miliardë eurosh. Krahas tij, deputetët do të shqyrtojnë edhe ndryshimet në legjislacionin tatimor, përfshirë tatimin mbi të ardhurat, TVSH-në, procedurat tatimore, taksat kombëtare dhe akcizat. Pas miratimit në parim në Kuvend, projektbuxheti do t’i rikthehet komisioneve parlamentare për shqyrtimin nen për nen, përpara se të kalojë sërish në seancë plenare për votimin përfundimtar.
Çfarë parashikon rendi i ditës?
Përveç projektbuxhetit dhe paketës fiskale, në seancën e sotme do të shqyrtohen edhe ndryshimet në ligjin për strehimin social, si dhe një projektvendim për ndryshimin e përbërjes së Komisionit të Posaçëm Parlamentar për fazën e dytë të Reformës Administrativo-Territoriale. Seanca do të përfshijë gjithashtu miratimin e procesverbalit të mbledhjes së 29 tetorit 2026, njoftime dhe diskutime për çështje jashtë rendit të ditës.
Rendi i ditës së seancës plenare:
- Miratimi i procesverbalit të seancës plenare të datës 29.10.2026.
- Njoftime.
- Projektligji “Për disa shtesa dhe ndryshime në ligjin nr. 29/2023, ‘Për tatimin mbi të ardhurat’, të ndryshuar”.
- Projektligji “Për disa ndryshime dhe shtesa në ligjin nr. 92/2014, ‘Për tatimin mbi vlerën e shtuar në Republikën e Shqipërisë’, të ndryshuar”.
- Projektligji “Për disa shtesa dhe ndryshime në ligjin nr. 9920, datë 19.5.2008, ‘Për procedurat tatimore në Republikën e Shqipërisë’, të ndryshuar”.
- Projektligji “Për disa ndryshime në ligjin nr. 9975, datë 28.7.2008, ‘Për taksat kombëtare’, të ndryshuar”.
- Projektligji “Për disa ndryshime dhe shtesa në ligjin nr. 61/2012, ‘Për akcizat në Republikën e Shqipërisë’, të ndryshuar”.
- Projektligji “Për buxhetin e vitit 2027”.
- Projektligji “Për disa ndryshime dhe shtesa në ligjin nr. 22/2018, ‘Për strehimin social’, të ndryshuar”.
- Projektvendimi “Për një ndryshim në vendimin nr. 169/2026 të Kuvendit ‘Për ngritjen e Komisionit të Posaçëm Parlamentar për fazën e dytë të Reformës Administrativo-Territoriale në Republikën e Shqipërisë’”.
- Diskutime për çështje jashtë rendit të ditës.







