LIGJET E BIZNESIT
Banka Qendrore e Republikës së Kosovës (BQK) ka dorëzuar zyrtarisht aplikimin për përfshirjen e vendit në Zonën e Vetme të Pagesave në Euro (SEPA), duke shënuar një hap të rëndësishëm drejt integrimit financiar me Bashkimin Evropian.
Anëtarësimi në këtë hapësirë do t’u mundësonte qytetarëve dhe bizneseve të Kosovës të kryenin transferta ndërkufitare në euro më shpejt, me kosto më të ulëta dhe në kushte më të favorshme. Përfitimet pritet të jenë veçanërisht të rëndësishme për shkak të lidhjeve të ngushta ekonomike me vendet evropiane dhe peshës së remitancave në ekonominë e vendit.
Sipas BQK-së, aplikimi është rezultat i reformave të ndërmarra gjatë viteve të fundit për përafrimin e legjislacionit me standardet e BE-së, modernizimin e infrastrukturës së pagesave dhe forcimin e kapaciteteve institucionale.
Në kuadër të këtij procesi janë avancuar ndryshimet në Ligjin për Shërbimet e Pagesave, Ligjin për Bankat, si dhe në legjislacionin për parandalimin e pastrimit të parave dhe financimit të terrorizmit. Një hap paraprak ishte edhe paraaplikimi i dorëzuar në tetor 2024, pas të cilit nisën konsultimet dhe vlerësimet me institucionet përkatëse evropiane.
Dorëzimi i aplikimit nuk nënkupton pranimin automatik të Kosovës në SEPA. Dokumentacioni do t’i nënshtrohet një procesi shqyrtimi dhe vlerësimi nga organet evropiane për përputhshmërinë me kërkesat ligjore dhe rregullative.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Në rast të një vendimi pozitiv, do të vijojnë procedurat për përfshirjen e institucioneve financiare të Kosovës në skemat përkatëse të pagesave.
BQK-ja thekson se do të vijojë bashkëpunimin me institucionet evropiane, bankat komerciale dhe ofruesit e shërbimeve të pagesave për të përmbushur edhe kërkesat teknike dhe operacionale të procesit.
