Bashkitë ngadalësojnë shlyerjen e borxheve, 3 miliardë lekë detyrime të prapambetura në fund të shtatorit

Bashkitë në vend kanë ngadalësuar ritmin e shlyerjes së detyrimeve të prapambetura ndaj qytetarëve dhe bizneseve, duke e mbyllur muajin shtator me një stok prej rreth 3 miliardë lekësh, ose 31 milionë eurosh. Të dhënat e Ministrisë së Financave tregojnë se detyrimet e prapambetura të pushtetit vendor kanë mbetur pothuajse në të njëjtat nivele me fundin e marsit dhe qershorit 2026. Ndërkohë, krahasuar me dhjetorin e vitit 2025, kur stoku ishte 2.9 miliardë lekë, konstatohet një rritje e lehtë. Pavarësisht ecurisë pozitive të shënuar gjatë dy viteve të fundit, shlyerja e detyrimeve vijon të karakterizohet nga luhatje nga një tremujor në tjetrin. Objektivi i qeverisë mbetet shlyerja e plotë e borxheve të akumuluara, megjithatë të dhënat e fundit tregojnë se procesi nuk po ecën me ritmin e synuar.

Investimet publike zënë pjesën më të madhe të detyrimeve

Sipas Ministrisë së Financave, nga totali i detyrimeve të prapambetura të bashkive, rreth 1.1 miliardë lekë janë fatura të papaguara për investime publike. Ndërkohë, 525 milionë lekë lidhen me shërbimet, rreth 356 milionë lekë me vendimet gjyqësore dhe 647 milionë lekë me shpenzime të tjera.

Kavaja bashkia me stokun më të lartë të borxheve

Sa i përket shpërndarjes së detyrimeve mes 61 bashkive të vendit, lista kryesohet nga Kavaja, e cila rezulton me 725 milionë lekë detyrime të prapambetura.

Në vendin e dytë renditet Pogradeci me 232 milionë lekë, i ndjekur nga Lezha me 208 milionë lekë. Më pas vijnë bashkitë Dimal dhe Tiranë, me rreth 142 milionë lekë detyrime secila.Në vijim të listës renditen Cërriku, Rrogozhina, Berati dhe Vora, ndërsa ndër bashkitë me stokun më të ulët të detyrimeve të prapambetura janë Përrenjasi, Dropulli dhe Shijaku. Të dhënat tregojnë se niveli i borxheve nuk lidhet domosdoshmërisht me madhësinë territoriale apo numrin e popullsisë së bashkive, por edhe me performancën e tyre financiare dhe menaxhimin e shpenzimeve.

Reforma territoriale, sfidë për financat vendore

Ndërkohë, Kuvendi ka miratuar së fundmi ndarjen e re administrativo-territoriale, e cila parashikon reduktimin e numrit të bashkive nga 61 në 45. Një prej objektivave të reformës është përmirësimi i performancës ekonomike dhe financiare të njësive të qeverisjes vendore. Mbetet për t’u parë nëse riorganizimi i pushtetit vendor do të sjellë një menaxhim më efikas të financave publike dhe, mbi të gjitha, një ritëm më të shpejtë në shlyerjen e detyrimeve ndaj bizneseve dhe qytetarëve.