LIGJET E BIZNESIT
Gjatë një takimi me kryeministrin Edi Rama dhe drejtuesit e sistemit bankar, Guvernatori i Bankës së Shqipërisë, Gent Sejko, ka garantuar qytetarët dhe bizneset për sigurinë e depozitave bankare, pavarësisht tensioneve dhe presionit të ditëve të fundit. Sejko theksoi rëndësinë e vijimit normal të aktivitetit të bankave, duke nënvizuar se sistemi bankar është një nga shtyllat kryesore të ekonomisë dhe se funksionimi i tij nuk duhet të cenohet.
“Pavarësisht tensionit dhe presionit, depozitat e qytetarëve janë të sigurta”, u shpreh guvernatori.
Sipas Sejkos, sistemi bankar është në shërbim të qytetarëve dhe bizneseve, ndërsa çdo cenim i aktivitetit të tij mund të sjellë problematika që prekin veprimtarinë e përditshme të të gjithë atyre që jetojnë dhe ushtrojnë aktivitet në Shqipëri. Ai garantoi gjithashtu se Banka e Shqipërisë do të vijojë operimin normal dhe kërkoi koordinim më të mirë të punës me aktorët e sistemit bankar, me qëllim shmangien e pengesave në ofrimin e shërbimeve.
“Unë ju falënderoj, garantoj kryeministrin, qytetarët dhe bizneset, Banka e Shqipërisë do të vazhdojë operimin siç ka vazhduar deri më tani. Do të donim të koordinonim sa më mirë punën, që të mos cenohen aktivitetet”, deklaroi Sejko. Deklarata e guvernatorit vjen në një moment tensionesh, ndërsa mesazhi i Bankës së Shqipërisë synon të sigurojë vijimësinë e shërbimeve bankare dhe besimin e qytetarëve te sistemi financiar.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
