LIGJET E BIZNESIT
Sipërmarrja në vend ka vijuar aktivitetin me ritme të larta edhe gjatë muajit shtator. Të dhënat e Qendrës Kombëtare të Biznesit tregojnë për afro 12 mijë aplikime online dhe rreth 2 mijë biznese të reja të regjistruara, ndërsa kërkesa për shërbime dhe asistencë ndaj sipërmarrësve ka vijuar të jetë e lartë. Gjatë muajit shtator, Qendra Kombëtare e Biznesit ka regjistruar në total 11 mijë e 939 aplikime online. Peshën kryesore e mban Regjistri Tregtar, me 9 mijë e 921 aplikime, i ndjekur nga Regjistri i Lejeve dhe Licencave me 1 mijë e 161 aplikime, si dhe Regjistri i Pronarëve Përfitues me 857 aplikime.
Paralelisht, në treg janë regjistruar 1 mijë e 985 biznese të reja, ndërsa janë lëshuar edhe 135 licenca dhe 10 leje të reja. Shifrat pasqyrojnë hyrjen e operatorëve të rinj në treg dhe vijimin e procedurave administrative nga subjektet që ushtrojnë aktivitet ekonomik.
Përveç regjistrimeve dhe aplikimeve, një pjesë e aktivitetit të QKB-së është përqendruar edhe te asistenca për bizneset. Gjatë këtij muaji janë trajtuar 886 kërkesa përmes sistemit të asistencës dhe postës elektronike, janë zhvilluar 773 biseda me operatorët përmes chat-it, si dhe janë asistuar 740 telefonata. Treguesit e shtatorit pasqyrojnë volumin e shërbimeve të ofruara nga Qendra Kombëtare e Biznesit, nga regjistrimi i subjekteve të reja deri te mbështetja për sipërmarrësit në përmbushjen e procedurave administrative. Numri i aplikimeve dhe regjistrimeve mbetet një tregues i aktivitetit të biznesit dhe jo domosdoshmërisht një matës i drejtpërdrejtë i rritjes së prodhimit apo i performancës ekonomike.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
