Dërgesat e emigrantëve në nivele rekord, 621 milionë euro vetëm në 6 muaj

Dërgesat e emigrantëve kanë shënuar një rekord të ri historik në pjesën e parë të këtij viti. Sipas të dhënave të Bankës së Shqipërisë, remitancat shënuan vlerën 621 milionë euro në periudhën janar-qershor, me rritje 16.7% kundrejt të njëjtës periudhë të një viti më parë.

Shtimi i remitancave është pasojë e emigrimit të vazhdueshëm e pandalshëm vitet e fundit. Këto flukse valutore kanë qenë në rritje të vazhdueshme. Vitin e kaluar ato kaluan nivelin e 1.1 miliardë eurove, duke qenë një burim i rëndësishëm i financimit të ekonomisë.

Rritja në nivele rekord e këtyre flukseve valutore është një dnër arsyet e rënies së euros në tregun tonë të këmbimit. Pasi pjesa më e madhe e emigrantëve shqiptarë, kryesisht emigrantëve që janë larguar në 10 vitet e fundit, jetojnë dhe punojnë në vendet europiane, duke i sjellë dërgesat në euro. Rrjedhimisht, remitancat kanë shtuar sasinë e mondhës europiane në treg, duke ushtruar presion në rënien e vlerës së saj.