LIGJET E BIZNESIT
Në kulmin e sezonit turistik, euro ka pësuar sërish rënie, një dukuri e pritshme në këtë periudhë të vitit. Sipas kursit zyrtar të Bankës së Shqipërisë, monedha europiane ka zbritur sot në 93.1 lekë, duke humbur 0.15 pikë krahasuar me ditën e djeshme.
Agjentët në pikat e këmbimit valutor e shpjegojnë këtë rënie të fortë të euros me sasinë e euros që po sjellin turistët e huaj dhe emigrantët që po kalojnë pushimet në atdhe. Ky fluks valutor ka shtuar sasinë e valutës në qarkullim dhe ka ushtruar presion në rënien e vlerës së euros.
Monedha europiane ka shfaqur tendenca rënëse që prej fillimit të vitit. Përvec turizmit, që tashmë po shfaq shtrirje gjithëvjetore dhe eurot e turistëve janë të pranishme në ekonominë shqiptare gjatë gjithë muajve, në rritje janë edhe flukset valutore nga burimet e tjera, si remitancat dhe investimet e huaja.
