“Porta e Alpeve”, ministri Karakaçi: Projekti që zhvillon veriun e vendit

Projekti “Porta e Alpeve” është një korridor i integruar që lidh Alpet Shqiptare me brigjet e Adriatikut. Një projekt që do të zhvillojë veriun e vendit. Ministri i Infrastrukturës dhe Energjisë, Enea Karakaçi evidentoi avantazhet e projektit, që do t’i përgjigjet zhvillimit të turizmit në pjesën veriore të Shqipërisë.

“Përmes këtij projekti, ne i hapim rrugë realizimit të një investimi strategjik për zhvillimin ekonomik të Shqipërisë së veriut, forcimin e infrastrukturës publike dhe mbështetjen e turizmit malor dhe gjithëvjetor, duke u theksuar kryesisht në qarkun e Shkodrës. Projektligji që paraqesim sot synon ratifikimin e kontratës financiare ndërmjet Republikës së Shqipërisë dhe Bankës Europiane të Investimeve, përmes së cilës do të akordohet një hua në vlerën 50 milionë euro për financimin e punimeve të infrastrukturës bashkiake në kuadër të projektit “Porta e Alpeve”, u shpreh ministri.

Vlera totale e projektit parashikohet të arrijë në 100 milionë euro, ndërsa për pjesën tjetër të financimit prej 50 milionë eurosh Qeveria Shqiptare tashmë ka marrë angazhimin zyrtar me KfË për sigurimin e plotë të mbështetjes financiare. Ky projekt përfaqëson një investim strategjik me ndikim afatgjatë në përmirësimin e ndërlidhjes territoriale, zhvillimin e turizmit të integruar dhe krijimin e një modeli të qëndrueshëm zhvillimi për veriun e vendit.

Në këtë kuadër, projekti synon ndërtimin për herë të parë të një korridori të integruar që do të lidhë Alpet Shqiptare me bregdetin Adriatik, me liqenin e Shkodrës, me lumin Buna, Velipojën dhe Shëngjinin. Ky koncept synon të krijojë një zinxhir të integruar ekonomik dhe turistik, duke lidhur turizmin malor me turizmin bregdetar dhe kulturor, si dhe duke krijuar më shumë mundësi zhvillimi për komunitetet lokale.