LIGJET E BIZNESIT
Papunësia tek të rinjtë në Shqipëri vijon të mbetet në nivele shqetësuese. Sipas raportit të fundit të Banka Botërore mbi ecurinë e ekonomive në Ballkanin Perëndimor, në vitin 2025 papunësia në këtë grupmoshë arrin në 21.5%. Ky nivel është ndjeshëm më i lartë se mesatarja e vendeve të Bashkimi Evropian, e cila qëndron në 14.7%, duke theksuar hendekun e dukshëm mes Shqipërisë dhe tregut europian të punës.
Një nga arsyet kryesore që mban të rinjtë larg tregut të punës lidhet me mosperputhjet e forta mes kërkesës dhe ofertës. Tregu shqiptar shpesh nuk arrin të përthithë aftësitë dhe pritshmëritë e të rinjve, duke krijuar një situatë ku shumë prej tyre mbeten jashtë punësimit ose të detyruar të pranojnë punë që nuk përputhen me profilin e tyre profesional.
Nga ana tjetër, struktura e tregut të punës në Shqipëri vazhdon të dominohet nga vende pune me paga relativisht të ulëta dhe në sektorë që nuk përbëjnë interes për të rinjtë, veçanërisht për ata të kualifikuar. Kjo situatë jo vetëm që ul motivimin për të hyrë në tregun vendas të punës, por nxit edhe kërkimin e alternativave jashtë vendit.
Në këtë kontekst, një faktor gjithnjë e më ndikues është edhe konkurrenca nga vendet e zhvilluara, të cilat vitet e fundit kanë rritur kërkesën për fuqi punëtore të re dhe të kualifikuar. Kjo tendencë ka përshpejtuar emigrimin e të rinjve shqiptarë, duke çuar në tkurrjen e fuqisë punëtore në vend.
Pasojat janë të dukshme: bizneset përballen me mungesë të burimeve njerëzore, ndërsa ekonomia shqiptare përballet me ulje të produktivitetit dhe me vështirësi në ruajtjen e ritmeve të qëndrueshme të zhvillimit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Për këtë arsye, ekspertët theksojnë nevojën për politika më të orientuara drejt lidhjes së arsimit me tregun e punës, rritjes së cilësisë së vendeve të punës dhe krijimit të kushteve që nxisin të rinjtë të ndërtojnë të ardhmen e tyre në Shqipëri.
