Ministrja Ibrahimaj në Samitin e Shkupit: Shqipëria, shembull rajonal në procesin e digjitalizimi

Ministrja e Ekonomisë dhe Inovacionit, znj. Delina Ibrahimaj, mori pjesë në punimet e Samitit të 11-të Digjital të Ballkanit Perëndimor, një nga platformat kryesore rajonale që synon të forcojë bashkëpunimin mes vendeve të rajonit në fushën e teknologjisë dhe inovacionit.

Në fjalën e saj në panelin “Making Public Services Work for Everyone”, Ministrja Ibrahimaj prezantoi arritjet e Shqipërisë në digjitalizimin e shërbimeve publike dhe inovacionin, duke theksuar se Shqipëria ka bërë hapa të rëndësishëm për të ndërtuar një administratë më efikase, transparente dhe pranë qytetarëve. Ajo solli në vëmendje platformën e-Albania 2.0, e cila do të ofrojë shërbime të personalizuara dhe gjithëpërfshirëse, duke garantuar akses edhe për persona me aftësi të kufizuara dhe të moshuarit.

Ministrja Ibrahimaj theksoi se Shqipëria është sot një shembull rajonal në procesin e digjitalizimit dhe se qëllimi i qeverisë shqiptare është të integrojë teknologjinë në çdo proces të administratës publike, për ta kthyer atë në bazë të zhvillimit të qëndrueshëm dhe të besimit tek institucionet.

Gjatë samitit, Ministrja zhvilloi edhe takime bilaterale:

• Me Zv. Komisioneren e Drejtorisë së Përgjithshme të Komisionit Evropian për Rrjetet e Komunikimit, Përmbajtjen dhe Teknologjinë (DG CNECT), ku u diskutua mbi përafrimin e Shqipërisë me zhvillimet digjitale të BE-së dhe rëndësinë e bashkëpunimit për të çliruar potencialin e rajonit.

• Me Zëvendësministrin e Informacionit dhe Telekomunikacionit të Serbisë, z. Slavisha Antiq, ku u trajtua modeli i Qendrës së të Dhënave Qeveritare të Serbisë si një praktikë nga e cila Shqipëria do të përfitojë eksperiencë dhe know-how për të forcuar kapacitetet kombëtare në këtë fushë.

Samiti Digjital i Ballkanit Perëndimor përbën një hap të rëndësishëm në drejtim të forcimit të bashkëpunimit rajonal dhe integrimit të vendeve të rajonit në tregun europian të inovacionit dhe teknologjisë, duke krijuar mundësi të reja për zhvillim dhe modernizim të administratave publike.