Bie inflacioni, por çmimet e ushqimeve mbeten të shtrenjta

Inflacioni, treguesi që mat koston e jetesës në vend ka zbritur në tetor në 1.9%. Ky është niveli më i ulët i këtij treguesi që prej qershorit të vitit 2021. Instituti i Statistikave konstaton se një vit më parë, inflacioni ishte 3.8 %.

Por ndërsa çmimet në tërësi janë në rënie, kjo nuk mund të thuhet për ushqimet, që kanë zëri kryesor në buxhetin e një familjeve shqiptare dhe vecanërisht grupeve vulnerabël, si pensionistët, familjet me ndihmë ekonomike etj.

Çmimet e ushqimeve u rritën në tetor me 3.1%, duke qenë 1.2% më i lartë se niveli i inflacionit. Brenda grupit të ushqimeve çmimet e nëngrupit “zarzavate përfshirë patatet” patën një rritje me 8.3 %, pasuar nga nëngrupet “peshk” me 4 %, “mish” me 3.9 %, “qumësht, djathë dhe vezë” me 3.2 %, “sheqer, recel, mjaltë, çokollata dhe mbëlsira” me 1.8 %, etj.

Ndryshimet vjetore të grupeve kryesore

Krahasuar me muajin Tetor 2023, rritja më e madhe e çmimeve vërehet në grupin “Argëtim dhe kulturë” me 5 %, pasuar nga grupet “Pije alkoolike dhe duhan” me 3.6 %, “Veshje dhe këpucë” me 3.5 %, “Ushqime dhe pije joalkoolike” me 3.1 %, “Mobilje, pajisje shtëpie dhe mirëmbajtje e shtëpisë” me 2.9 %, “Mallra dhe shërbime të ndryshme” me 1.9 %, “Hotele, kafene dhe restorante” me 1.8 %, “Qira, ujë, lëndë djegëse dhe energji” dhe “Shëndeti” me 1.2 % secili, “Komunikimi” me 0.8 %, “Shërbimi arsimor” me 0.7 %. Nga ana tjetër, çmimet e grupit “Transporti” shënuan ulje me 5.3 %.