Kërkesat e vendit për energji plotësohen me import, blerjet e energjisë rriten me 75.2% në tremujorin e dytë

Prodhimi vendas i energjjisë ka pësuar rënie, ndërsa kërkesat në rritje të vendit po plotësohen me import. Të dhënat e Institutit të Statistikave tregojnë se gjatë tremujorit të dytë të këtij viti, energjia elektrike në dispozicion u ul me 2,2 %. Prodhimi neto vendas i energjisë elektrike në këtë periudhë u ul me 18,9 %, duke arritur vlerën 1.841 GWh nga 2.269 GWh energji të prodhuar në tremujorin e dytë të vitit 2023.

Ndërkohë që importi bruto i energjisë elektrike (energji në marrje), në tremujorin e dytë të vitit 2024, arriti vlerën 623 GWh nga 355 GWh që ishte në të njëjtën periudhë të një viti më parë, duke shënuar kështu një rritje me 75,2 %.

INSTAT konstaton se eksporti bruto i energjisë elektrike (energji në dhënie) arriti vlerën 665 GWh nga 786 GWh duke shënuar një rënie me 15.4 %

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Të dhënat e detajuara tregojnë se kontributin kryesor në prodhimin e energjisë e kanë dhënë hidrocentralet privatë, nga të cilët u prodhua 48.6% e totalit të energjisë, ndërsa nga hidrocentralet publikë u mundësua 44.6% e prodhimit vendas të energjisë. Nga prodhuesit e tjerë (fotovoltaikët) u prodhua 6.8 % të prodhimit neto vendas të energjisë elektrike.

Humbjet në rrjet arritën vlerën 323 GWh nga 359 GWh, duke shënuar kështu një rënie me 10,0 %. Humbjet në transmetim jane ulur me 17,2 %, ndërsa humbjet në shpërndarje gjithashtu, kanë rënë me 8,6 %. Humbjet teknike në shpërndarje kanë shënuar një rënie me 7,5 %, ndërsa humbjet jo teknike në shpërndarje kanë shënuar një rënie me 11,2 %, krahasuar me tremujorin e dytë të vitit 2023.

Përdorimi i energjisë elektrike nga konsumatorët, në tremujorin e dytë të vitit 2024, u ul me 0,3 % duke arritur vlerën 1.475 GWh nga 1.479 GWh që ishte në tremujorin e dytë të vitit 2023. Rënie ka shënuar konsumi I energjisë nga bizneset. Për tremujorin e dytë të këtij viti, konsumatorët jo familjarë e kanë ulur konsumin e energjisë me 2,3 %, ndërsa energjia e konsumuar nga konsumatorët familjarë është rritur me 2,1 %.