Euro drejt 100 lekëve, thirrja e biznesit : Ky është alarmi i kuq!

Përfaqësuesit e biznesit japin alarmin, nëse euro do të zbresë nën kuotën e 100 lekëve. Arben Shkodra, sekretar i Përgjithshëm i Shoqatës së Prodhuesve e konsideron këtë nivel si alarmin e kuq, i cili po arrihet me shpejtësi, duke vendosur në vështirësi kryesisht biznesin eksportues.

“Biznesi e ka të pamundur të bëjë llogaritë apo parashikimet. Ka dalë jashtë të gjitha parametrave. Poshtë kuotës 100 lekë fillon dhe bëhet shumë e rrezikshme. Në qoftë se është shqetësuese dhe biznesi në një farë forme ka filluar ta adaptojë modelin e vet të biznesit, disa kanë shkurtuar shpenzimet e tepërta, disa kanë rinegociuar kontratat, edhe pse vjen një pikë kur nuk më të rinegociosh më as kontratat pasi del nga tregu. Prandaj them se kalimi nën 100 lekë është alarmi i kuq. Nëse ne jemi sot në pranverë me euron 102 lekë, ajo vija e kuqe është e prekshme”, ka deklaruar Shkodra në emisionin A2 Business të gazetares Aurora Sulce.

Monedha europiane e ka mbyllur javën në kuotën e 102.5 lekëve, duke humbur mbi 10 lekë kundrejt prillit të vitit të kaluar.