Rritet mosha e daljes në pension për gratë. Nëse deri në dhjetor, një grua duhet të kishte 38 vite vjetërsi pune, për të dalë në pension 61 vjeçe e 6 muaj, duke filluar nga janari i këtij viti ajo del në pension edhe 2 muaj më vonë.
Kjo rritje e moshës për gratë është parashikuar në reformën e pensioneve, që ka hyrë në fuqi që prej vitit 2015.
Ndërkohë, për burrat mosha për të dalë në pension është 65 vjeç. Ky nivel nuk parashikohet të ndryshojë për disa vite. Por, për ta ndryshon portofoli i sigurimeve shoqërore. Kjo do të thotë që vjetërsia e tyre e punës që deri vitin e kaluar ishte 38 vjet, tashmë do t’u duhen 38 vjet e 4 muaj për të përfituar pensionin.
Prej 8 vitesh, skema e pensioneve ndryshon, si rrjedhojë e reformës së vitit 2015, dhe pritet të ndalet në vitin 2056, kur mosha e daljes në pension të barazohet në 67 vjeç për gratë dhe burrat.
E ndërsa vitet e punës shtohen pensionet mbeten ende të ulëta. Sipas të dhënave nga Instituti i Sigurimeve Shoqërore, pensioni mesatar në vendin tonë është 14 mijë lekë, ndërkohë që përfitues të pagesave mujore janë rreth 700 mijë pensionistë.
