“Rama bëri një lëvizje budallaqe” Ja si e komenton Nano zgjedhjen e presidentit të ri

Analisti i njohur Mustafa Nano ka përsëritur qendrimin e tij se presidenti i zgjedhur Bajram Begaj i ka lënë shije të keqe, edhe pse nuk e njeh personalisht.

Sipas tij kjo ndodhi nga mënyra se si e përuroi fillimin e mandatit.

“Nuk është futur ende në zyrë, por u zgjodh, për mua ai u zgjodh që kur i doli emri nga socialistët. U bë një takim mes Kryeministrit dhe Presidentit që do zgjidhej, ku e donte kryeministri, si e donte, për të treguar që ky është njeriu im.

Më duket lëvizje budallaqe e Ramës, nuk e di pse e bëri. Lëre publikun ta mendoj, këtu nuk e kuptoj Ramën, kam parë Presidentin, që e trajtoi Kryeministrin si punëdhënësin.

U pa si betim para Kryeministrit. Ndoshta nuk është faj i tij, ndoshta ishte kurth ku e futën, por kjo ishte mënyra më e keqe për ta filluar mandatin presidencial.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Na duhet një President me personalitet, jo anti-qeveritar. Qeveria është e tij, më së pari e tij. Duhet të tregojë personalitet, forcë, duhet të dijë ti rezistojë presionit.

Ne na mungon njohja. Kam përshtypjen se ne e njohim më shumë se Rama. Nuk di ta ketë takuar më parë, edhe nëse e ka takuar e ka takuar 5 minuta, jo sa për ta njohur.

Ai mund të na zhgënjejë të gjithëve nesër, por edhe mund të na befasojë.”, tha ai.

Nano deklaroi se Presidentët nuk kanë shfrytëzuar të drejtën për të mbajtur fjalim në Parlament, para popullit për një çështje të caktuar, duke e argumentuar me faktin se iu mungon personaliteti.

Sipas tij, Presidenti duhet të jetojë me pulsin e kombit.

Lidhur me akuzat e ngritura ndaj SPAK, për Presidentin e zgjedhur Bajram Begaj, Nano tha se nëse ka një padi të ngritur nga SPAK, nuk duhet të përfshihemi te sporti i akuzave, siç tha ai, e quajti Kryeministri.

“Nuk besoj se ka pasur komplot ndaj Bajram Begaj, ndaj duhen pritur vendimet e SPAK. Nëse ka pasur një padi, mazhorancën duhet ta pengonte për të bërë këtë që bëri, për sa kohë është bërë nga një strukturë shtetërorë.”, u shpreh Nano.