“Nesër protestë” I riu ndërroi jetë në Komisariat, Berisha tregon se ku do të bëhet organizimi

Në një konferencë për mediat nga selia e PD, ish-kryeministri Sali Berisha komentoi ngjarjen e rëndë të ndodhur në Komisariatin e Kavajës, ku 28-vjeçari Ilvi Meta, humbi jetën.

Berisha u shpreh se drejtori i Përgjithshëm i Policisë heshti sikur nuk ka ndodhur asgjë, ndërsa kërkoi dorëheqjen e menjëhershme të ministrit Çuçi.

“Ministri i familjes që në vend të merret me zbatimin e ligjit, është gardian i interesave kriminale të klanit Rama. Drejtori i Përgjithshëm i Policisë heshti sikur nuk ka ndodhur asgjë. Kjo është dhe më kriminale. Heshti në një kohë kur në një hark kohor 5-javor 2 të rinj u vdiqën në qelitë e komisariatit të policisë ku duhet të ishin më të sigurt. Duke dënuar këtë qëndrim çnjerëzor të drejtuesve të shtetit, kërkoj dorëheqjen e menjëhershme të ministrit Çuçi”-tha Berisha.

Më tej ish-kreu i qeverisë njoftoi protestën e radhës nesër në orën 8 para komisariateve të policisë.

“Ndërkohë unë do t’i propozoj sot Komisionit të Rithemelimit nesër në orën tetë në komisariatet e policisë të ndizen qirinj, në një protestë paqësore. I bëjmë thirrje Komitetit anti-torturë të Këshillit të Europës me urgjencë të ushtrojë kontrolle në institucionet e vuajtjes së dënimit e policisë në mënyrë që të marrin fund torturat në Komisariate.”, tha Berisha.

“Po arrijmë në nivelet e Rusisë së Putinit”-vijoi ai.