LIGJET E BIZNESIT
Një nga personat e shpallur në kërkim për ngjarjen e ndodhur një muaj më parë në fshatin Zejmen të Lezhës është edhe nipi i deputetit të PS-së Rrahman Rraja. Bëhet fjalë për Ramazan Rraja, që akuzohet për vrasje të mbetur në tentativë dhe dy vepra të tjera penale.
Marrë shkas nga provat e grumbulluara, shërbimet e Policisë bënë të mundur identifikimin dhe shpalljen në kërkim të autorëve të dyshuar të ngjarjes, shtetasit:
– Ramazan Rraja, 28 vjeç, Alesio Dobrozi, 31 vjeç, banues në Fushë Krujë dhe Roan Brahimi, 29 vjeç, banues në Pllanë, Lezhë, me precedentë të mëparshëm kriminal në fushën e krimeve ndaj personit, armëmbajtjes pa leje dhe narkotikëve, të cilët menjëherë pas ngjarjes janë larguar jashtë vendit.
Këta persona mbrëmjen e 13 nëntorit u futën në një lokal në Zejmen dhe aty kërkonin një person tjetër. Ato dhe ishin të armatosur e me maska.
Ka rezultuar se për shkak të një konflikti të ndodhur më parë ndërmjet kushëririt të pronarit të lokalit dhe një shtetasi që është mik i shtetasve Ramazan Rraja, Alesio Dobrozi dhe Roan Brahimi, këta persona kanë shkuar të armatosur në lokalin në pronësi të shtetasit me iniciale A. K., dhe kanë kërkuar kushëririn e tij, shtetasin me iniciale L. M.(K), (i cili më herët ishte konfliktuar me shtetasin me iniciale Gj. J., mik i tre autorëve të dyshuar).
Shtetasi me iniciale L. M.(K), në momentet e ngjarjes nuk ka qenë në ambientet e lokalit. Ramazan Rraja dhe dy shokët e tij pasi kanë konstatuar se personi që kërkonin nuk ndodhej në lokal, kanë marrë kartat e identitetit të klientëve dhe i kanë verifikuar ato. Më pas janë larguar.
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme, për veprat penale “Vrasja” e mbetur në tentativë, “Armëmbajtja pa leje” dhe “Kanosja”, e mbetur në tentativë, të kryera në bashkëpunim.
Ramazan Rraja, nipi i deputetit te PS
Ramazan Rraja, nipi i deputetit socialist Rrahman Rraja është një person problematik i cili është ndaluar nga Policia për ngjarje të ndryshme, por që është liruar. Në vitin 2019 ky person është rrahur me mbështetës të PD-së në Vorë, për zgjedhjet që bëheshin atë vit.
Në vitin 2020 ky shtetas dhunoi një vajzë në ambientet e QSUT. Ngjarja u filmua nga persona të tjerë dhe u shpërnda masivisht në media. Edhe për këtë rast Ramazan Rraja doli i pastër.
Nipi i deputetit të PS u arrestua dhe nga policia belge, si pjesë e një grupi i cili merrej me trafikimin e lëndëve narkotike, mirëpo u lirua me vendim gjykate në muajin maj të këtij viti, me pretendimin se nuk kishte prova të mjaftueshme për mbajtjen e tij pas hekurave. (Video e ngjarjes nga Fax News)
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
