LIGJET E BIZNESIT
Përfaqësues të qeverive, institucioneve financiare, investitorë dhe drejtues biznesesh nga Europa dhe rajoni do të mblidhen në Tiranë në edicionin e dytë të Konferencës së Investimeve BE-Ballkani Perëndimor. Në fokus do të jenë projektet e reja të investimit dhe partneritetet ekonomike.
Tirana do të jetë më 25 dhe 26 nëntor qendra e diskutimeve për investimet dhe bashkëpunimin ekonomik mes Bashkimit Europian dhe Ballkanit Perëndimor. Kryeqyteti shqiptar do të mirëpresë edicionin e dytë të Konferencës së Investimeve BE-Ballkani Perëndimor, ku pritet të marrin pjesë përfaqësues të institucioneve publike, institucioneve financiare ndërkombëtare, investitorë dhe drejtues biznesesh.
Pas edicionit të parë, konferenca rikthehet me synimin për të nxitur projekte të reja investimi dhe për të krijuar partneritete konkrete mes kompanive europiane dhe atyre të rajonit. Në fokus të diskutimeve do të jenë sektorë strategjikë, përfshirë energjinë, infrastrukturën, transportin, turizmin, teknologjinë dhe zhvillimin e kapitalit njerëzor.
Përveç diskutimeve në nivel të lartë, aktiviteti do të përfshijë takime të drejtpërdrejta biznes me biznes (B2B) dhe sesione të posaçme për krijimin e partneriteteve të reja. Synimi është që potenciali ekonomik i Ballkanit Perëndimor të përkthehet në projekte konkrete dhe mundësi të reja financimi.
Organizimi i konferencës në Tiranë shihet si një mundësi për të promovuar Shqipërinë përpara investitorëve europianë, për të forcuar lidhjet ekonomike me tregun e Bashkimit Europian dhe për të nxitur integrimin ekonomik rajonal. Kompanitë dhe investitorët pjesëmarrës do të mund të prezantojnë projektet e tyre, të krijojnë kontakte të reja dhe të shqyrtojnë mundësi bashkëpunimi në sektorët me potencial të lartë zhvillimi.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
