“Nëse nuk vaksinoheni, s’ka kthime në auditore” Rama paralajmëron edhe njëherë studentët

Gjatë inspektimit të qendrës shëndetësore nr 1. në Tiranë, sot kryeministri Edi Rama bëri sërish thirrje që njerëzit të vaksinohen.

Ai tha se injeksioni nuk të mbron nga infektimi, por nga vdekja dhe që ta kalosh sëmundjen me simptoma sa më të lehta.

Kreu i qeverisë përsëriti dhe njëherë paralajmërimin se nëse studentët apo mësuesit nuk vaksinohen, ata nuk do të rikthehen në auditor.

“Vaksina jo domosdoshmërisht të mbron nga infektimi. Por ama në momentin që infektohesh të mbron nga vuajtjet dhe rreziku për jetën. Ndërsa mosvaksinimi të dërgon deri në vdekje. Studentët që nuk vaksinohen nuk futen në auditor. Sepse s’ka mundësi që pjesa është e vetëdijshme të cënohet nga ata që tremben nga teoritë e konspiracionit. Askush nuk i merr me forcë, e s’ka ndërmend t’i marrë me forcë, por në mjedise kur janë dhe të tjerët duhet të vaksinohesh. E njëjta gjë vlen edhe për mësuesit dhe administratën. Protestën ndaj shkencës apo marrëzinë në raport me realitetin. E mirë është të vaksinohesh, sepse jeta duhet mbrojtur. Nuk mund të cënosh jetën e tjetrit”, tha Rama ndër të tjera.