Tritol në makinë/ Gjykata lë në burg vëllain e kandidatit për deputet, skenari u zbulua nga përgjimet

Gjykata ka caktuar sot masën e sigurisë “Arrest me burg” për Alfred Debreshin.

Ky i fundit akuzohet se i vuri tritol në makinë vëllait të tij, minatorit dhe kandidatit për deputet Elton Debreshi.

Dyshohet se të dy e kanë inskenuar ngjarjen për të përfituar azil në Gjermani.

Kjo është pista kryesore e prokurorisë së Dibrës, e cila ka kryer një përgjim ambiental të bisedës së dy vëllezërve, Eltonit dhe Alfredit, i cili tashmë është lënë pas hekurave i dyshuar si autor i vendosjes së tritolit në makinën parkuar në oborrin  e shtëpisë, që shkaktoi vetëm dëme të vogla materiale.

Nga përgjimet rezultoi se Alfred Debreshi, është person i implikuar drejtpërdrejt në këtë ngjarje, pasi në bisedat e tij, ai disa herë i drejtohet vëllait të tij, Eltonit, me fjalët më fute në burg”. Po kështu gjatë bisedave ambientale të përgjuara, vëllezërit Debreshi flasin për mënyrën se si ato e kanë deklaruar ngjarjen përpara policisë dhe janë shumë të shqetësuar pasi deklarimet e Alfredit nuk përputhen me të Eltonit.