LIGJET E BIZNESIT
Ditën e sotme Komisioni i Pavarur i Kualifikimit ka vendosur të shkarkojë nga detyra gjyqtarin e Apelit të Tiranës, Fatri Islamaj.
Ishte pikërisht trupa e përbërë nga Pamela Qirko, Lulzim Hamitaj dhe Valbona Sanxhaktari që vendosi shkarkimin e tij.
Sipas trupës gjykuese është konstatuar se nuk ka kryer deklarim të saktë të pasurive, nuk ka pasur burime të ligjshme për krijimin e tyre, ka refuzuar të deklarojë, ka kryer deklarim të rremë dhe fshehje, por nuk gjendet në kushtet e konfliktit të interesit, sipas citimit referuar ILDKPKI.
Në seancën dëgjimore të 3 dhjetorit, ishte relatorja ajo që bëri të ditur pasuritë e deklaruara të tij përpara se të dilte në Vetting.
Për një apartament në Tiranë të blerë në vlerën 10.5 milionë lekë me pjesë takuese 50% për qind, Islamaj ka deklaruar si burim krijimi një kredi të marrë në një bankë në shumën 10.5 milionë lekë. Relatorja tha se çmimi i blerjes së apartamentit ka qenë preferencial për gjyqtarin Islamaj. Ajo shtoi se edhe banka i kishte dhënë kredi në vlerën 100 për qind të blerjes së apartamentit pa pasur ndonjë kolateral si garanci. Por subjekti tha se ka pasuri neto gjithsej në vlerën 3.4 milionë lekë dhe se të ardhurat e tij janë 21 milionë lekë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sipas të dhënave të bëra tashmë publike nga Birn, sa i takon pasurisë, Islamaj rezulton me shtesë pasurie familjare të pambuluar me burime në vitin 2007 në vlerën e rreth 474 mijë lekëve, pa llogaritur shpenzimet e konsumit familjar për vitin. Ndërkaq edhe dy depozita bankare nga bashkëshortja, figurojnë të pashoqëruara me burime të deklaruara. Kësisoj, Islamaj nuk ia ka dalë të qendrojë në sistemin e drejtësisë.
Islamaj, gjyqtar në Apelin e Tiranës, u përzgjodh si anëtar i KED-së për vitin 2019, në shortin e zhvilluar nga Kuvendi i Shqipërisë në Dhjetor të vitit 2018. Ai ishte një ndër tre nga trupa prej 7 anëtarësh e KED-së që nuk kishte kaluar në procesin e rivlerësimit.
