LIGJET E BIZNESIT
Zyrat e Gjendjes Civile kanë marrë një udhëzim verbal për të përditësuar listat e zgjedhësve në të gjithë Shqipërinë, për t’i pasur gati brenda pak ditësh.
Kjo kërkesë, gjithësesi informale deri më tani, përkon me lëvizjet e fundit politike, kur deputetët e opozitës kanë nënshkruar deklaratat për dorëzimin e mandatit parlamentar, gjë e cila mund të shoqërohet me zgjedhje të parakohshme në Shqipëri.
Punonjësit e Gjendjeve Civile prej muajsh po punojnë për azhurnimin e listës së zgjedhjësve, të cilët do të marrin pjesë në votimet për drejtuesit e pushtetit lokal, të cilat pritet të zhvillohen në 30 qershor 2019.
Sipas Kodit Zgjedhor, lista e votuesve përgatitet jo më vonë se 40 ditë para zgjedhjeve. Pra, si rregull, azhornimi i listës së zgjedhësve për pushtetin lokal duhet të përfundojë në 10-ditëshin e dytë të muajit Maj 2019.
Por, zyrtarët e Gjendjes Civile janë vendosur nën një situatë “alerti”. Ata janë orientuar të përgatisin listat zgjedhore në një kohë shumë më të shpejtë. Kodi Zgjedhor parashikon se, në rast të zgjedhjeve të parakohshme, zyrat e gjendjes civile duhet të përgatisin listat zgjedhore brenda 5 ditëve nga dekreti i Presidentit për shpalljen e tyre.
Përsa kohë që nuk ka ende një vendim për zgjedhje të parakohshme, shoqëruar me dekretin përkatës të Presidentit, Ministria e Brendshme nuk ka nxjerrë urdhër zyrtar për përditësimin e listës së zgjedhësve.
Por, në mënyrë verbale, është shpërndarë udhëzimi verbal për zyrat e gjendjes civile që të përgatisin listat, për të qenë në gatishmëri në rast se ka zhvillime të forta politike që do të çonin në zgjedhje të parakohshme.
Të mërkurën e kësaj jave, deputetët opozitarë të Partisë Demokratike (PD) dhe të Lëvizjes Socialiste për Integrim (LSI) firmosën deklaratat, në bazë të të cilëve dorëzojnë mandatet parlamentare.
Pritet që këto deklarata të dorëzohen në Parlamentin e Shqipërisë e më tej, ky institucion ia përcjellë Komisionit Qendror të Zgjedhjeve.
Në planin kushtetues dhe ligjor, dorëzimi i mandatit të deputetëve nuk është shkak për shpërndarjen e Parlamentit, për sa kohë ai funksionon me shumicën e thjeshtë të deputetëve.
Pra, Parlamenti Shqiptar, formalisht, mund të vijojë funksionet e tij edhe vetëm me deputetët e Partisë Socialiste (PS), të Partisë për Drejtësi Integrim e Uniteti (PDIU) dhe dy deputetët e Partisë Demokratike që nuk kanë nënshkruar ende deklaratën e dorëheqjes nga mandati.
Por, në aspektin politik dhe të demokracisë, një Parlament pa opozitë nuk i shërben askujt. Ndaj, burokratët qeveritarë, mesa duket, po parashikojnë mundësinë e zgjedhjeve të parakohshme. E, për këtë arsye, është udhëzuar që të përgatiten listat e zgjedhësve, për “çdo zhvillim të mundshëm”.
Nga Boldnews.al
